LAWAS banar sudah Utuh - ngarannya kada bujuran - behodengan wan Galuh (ini gin ngarannya kada bujur jua). Parak tiga tahun bedua ini behodengan. Umur bubuhannya ini jauh banar pang, Utuh sudah 27 tahun, sementara Galuh wayah ini hanyar 18 tahun. Pas Galuh sudah lulus sekolah, Utuh lalu handak membawai hodengannya itu kawin. Makanya inya membawani Galuh ke restoran nang kada biasanya.
"Rasa kada biasa pian membawai ulun ke wadah nang larang kayak ini. Ada apalah, pina baik banar," jar Galuh betakon wan Utuh.
"Kada apa-apa ding ai. Unda handak membari kabar haja gasan ikam kaina. Tapi kita membantas haja dulu. Pesan haja makanan nang larang-larang, soal membayarnya itu urusan unda," jar Galuh.
Sudah tuntung menumbas makanan nang larang-larang, Utuh mulai mewanikan hatinya bepadah wan Galuh. Intinya Utuh handak membawai Galuh kawin alias handak dijadikan bininya.
Wan gugup jua, Utuh menyampaikan niatnya itu.
"Kayak ini nah ding, unda handak mehalalkan ikam jadi ampun unda. Unda sudah kada sabar lagi sudah, kayak apa? Ikam mau kah?," jar Utuh.
Mendangar itu, Galuh langsung sarik. Bediri inya sambil membanting lap muntung di meja.
"Kayak apa pian ini? Masa ulun handak dihalalkan. Pian kira ulun ini babi kah?," jar Galuh menyenyarik.
Tekelipik Utuh melihat hodengannya marah. Lakas-lakas inya menyuruh Galuh duduk pulang.
"Ikam dangari dulu. Maksud unda mehalalkan itu handak membawai ikam kawin. Amun kita behodengan tarus, kaina amun ada apa-apa bisa bahaya. Makanya kita kawin haja, supaya halal amun handak beapa-apa," jar Utuh.
Mendangar itu Galuh langsung kesupanan sorang.
"Pian kada bepadah handak membawai ulun kawin pang. Coba tahu ulun kada marah-marah duluan tadi," jar Galuh kesupanan. (air/upi)